Իտալիայի Հանրապետության ազգային տոնին նվիրված երեկո Կամերայինում
Իտալիայի Հանրապետության ազգային տոնին և Հանրապետության հռչակման 80-ամյակին նվիրված հանդիսավոր երաժշտական երեկո է անցկացվել հունիսի 3-ին Կոմիտասի անվան կամերային երաժշտության տանը, որտեղ Հայաստանի պետական կամերային նվագախումբը ներկայացրել է «Իտալական երաժշտության մարգարիտները՝ բարոկկոյից մինչև կինոերաժշտություն» համերգային ծրագիրը։
Համերգի մեկնարկին ողջույնի խոսքով հանդես է եկել Հայաստանում Իտալիայի Հանրապետության արտակարգ և լիազոր դեսպան Ալեսսանդրո Ֆերրանտին՝ անդրադառնալով հայ-իտալական մշակութային համագործակցությանն ու դրա զարգացման հեռանկարներին։
Համերգը ղեկավարել է Հայաստանի պետական կամերային նվագախմբի գեղարվեստական ղեկավար և գլխավոր դիրիժոր Վահագն Պապյանը, մենակատար՝ մեցցո-սոպրանո Բելլա Ամարյան։
Ծրագրի սկիզբը տրվել է Արկանջելո Կորելլիի հանրահայտ, վեց մասից բաղկացած «Սուրբ Ծննդյան կոնցերտ» ստեղծագործությամբ, որը բարոկկո երաժշտության ամենանշանավոր և սիրված ստեղծագործություններից է։
Համերգային ծրագրում ներառված էին նաև Օտտորինո Ռեսպիգիի, Լուիջի Բոկերինիի, Ջակոմո Պուչինիի և Պիետրո Մասկանիի ստեղծագործությունները։
Երեկոն եզրափակվել է Նինո Ռոտայի՝ Ֆեդերիկո Ֆելինիի «Ամարկորդ» ֆիլմի հանրահայտ մեղեդիով, որը հանդիսատեսին փոխանցել է իտալական կինոերաժշտությանը բնորոշ նուրբ հուզականությունն ու ջերմությունը։
Հայաստանի պետական կամերային նվագախմբի և Հայաստանում Իտալիայի Հանրապետության դեսպանության միջև ձևավորված համագործակցության շրջանակում վերջին տարիներին իրականացվել են մի շարք համատեղ ծրագրեր, որոնց շնորհիվ հայ հանդիսատեսը հնարավորություն է ունեցել ծանոթանալու իտալական երաժշտարվեստի նշանավոր ներկայացուցիչների ստեղծագործական գործունեությանը և կատարողական արվեստին։