ՀԱՅԱՍՏԱՆԻ ՊԵՏԱԿԱՆ ԿԱՄԵՐԱՅԻՆ ԵՐԳՉԱԽՈՒՄԲ
Ստեղծվել է 2000 թ. հոկտեմբերին, գեղարվեստական ղեկավար և գլխավոր դիրիժորն է ՀՀ ժողովրդական արտիստ Ռոբերտ Մլքեյանը:
2001-ին երգչախումբը 3 անգամ համերգներով հանդես է եկել Լոնդոնում: 2006 թվականին համերգներով հանդես է եկել Սանկտ Պետերբուրգի «Սպիտակ դահլիճ»-ում և Եկատերինյան պալատում․այդ համերգով եզրափակվեց Ռուսաստանում Հայաստանի մշակութային տարին: 2007-ին երգչախումբը բացառիկ համերգով հանդես է եկել Ստրասբուրգի Եվրախորհրդի համերգային դահլիճում:
Հյուրախաղերով ելույթներ է ունեցել Լոնդոնում, Փարիզում, Ժնևում, Թբիլիսիում, Գորիում, Մոսկվայում, Սանկտ-Պետերբուրգում, Ֆրանկֆուրտում, Ստրասբուրգում, Բերգամոյում, Տորոնտոյում, Օտտավայում, Նիագարայում, Դրեզդենում, Լոս Անջելեսում, Սան Ֆրանցիսկոյում, Բերկլիում (համաշխարհային համբավ ունեցող «Քալ փերֆորմանս» համերգային կազմակերպության հրավերով)։
2009-ին Կոմիտասի ծննդյան 140-ամյակի կապակցությամբ երգչախումբը մեծ հաջողությամբ հանդես է եկել համերգ-դասախոսություններով Ֆրանսիայում և Շվեյցարիայում:
2015-ին Հայոց ցեղասպանության 100-րդ տարելիցի միջոցառումների շրջանակներում համերգներ է ունեցել Շվեյցարիայում (Բերնի կենտրոնական տաճար, Ցյուրիխ), Լիբանանում, Արգենտինայում, Հունաստանում (Աթենք, Սալոնիկ):
Ելույթներ է ունեցել Սեն-Լուի տաճարում, Սալ Գավո (Փարիզ), Սպիտակ դահլիճում, Սմոլնի տաճարում, Գլազունովի դահլիճում (Սանկտ Պետերբուրգ), Եվրախորհրդի դահլիճում-«Salle Schwietzer at the Palais de la Musique et des Congres of Strasbourg» (Ստրասբուրգ), Դոնիցետտիի օպերային թատրոնում (Բերգամո), «Ֆրաուկիրխե տաճար» (Դրեզդեն), Կոլոն օպերային թատրոնում (Բուենոս Այրես), «Մեգարոն» համերգասարահում (Աթենք):
Կամերային երգչախմբի մեծագույն ձեռքբերումներից կարելի է համարել համաշխարհային ճանաչում ունեցող ECM Records-ի թողարկած Եղիշե Չարենցի 10 բանաստեղծությունների հիման վրա գրված Տիգրան Մանսուրյանի «Ars Poetica» երգչախմբային կոնցերտի ձայներիզը, որը 2006-ին Համաշխարհային երաժշտական գեղխորհրդի կողմից ստացավ 5 աստղ, որի ամբողջական ինֆորմացիան զետեղված է անգլիական «The Gramophone» երաժշտական պատվավոր կատալոգի էջերում: Այդ կապակցությամբ իբրև պատվավոր հյուր հրավիրվել է Իտալիայի Բերգամո քաղաքում կայացած ժամանակակից երաժշտության միջազգային փառատոնին:
Երգչախմբի բազմաժանր երգացանկում ընդգրկված են համաշխարհային կոմպոզիտորների խմբերգային և ոկալ–սիմֆոնիկ բազում ստեղծագործություններ, վաղ միջնադարից մինչև այսօր, այդ թվում կատարվել են բազմաթիվ Հայաստանյան պրեմիերաներ:
ՀՊԿԵ-ի կարևոր առաքելությունը հայ կոմպոզիտորների ստեղծագործությունների քարոզչությունն է: Փայլուն կատարում է Կոմիտասի, ինչպես նաև ժամանակակից հայ կոմպոզիտորների ստեղծագործությունները: Երգչախումբը հանդես է եկել համաշխարհային պրեմիերաներով` կատարելով Տիգրան Մանսուրյանի, Դավիթ Հալաջյանի, Երվանդ Երկանյանի, Էդուարդ Հայրապետյանի և այլ կոմպոզիտորների ստեղծագործությունները:
Երևանում հաճախակի տեղիունեցող համերգների հետ մեկտեղ ՀՊԿԵ իրագործում է բարեգործական ծրագրեր` բազմաթիվ ստեղծագործությունների կատարումներով հանդես գալով ուսումնական հաստատություններում և Հայաստանի մարզերում` երգչախմբային արվեստը ներկայացնելով Հայաստանի լայն հանրությանը:
ՌՈԲԵՐՏ ՄԼՔԵՅԱՆ
գեղարվեստական ղեկավար և խմբավար
Երաժշտական գործունեության առաջին քայլերը սկսել է ջութակահարի մասնագիտությամբ: Զուգահեռաբար սովորել է սիմֆոնիկ և երգչախմբային դիրիժորություն՝ ուսումը շարունակելով Սանկտ Պետերբուրգում:
Մասնագիտական մեծ փորձ է ձեռք բերել, աշխատելով Երևանի Կոմիտասի անվան կոնսերվատորիայի կոմպոզիցիայի և երաժշտագիտական ամբիոնի ուսանողների երգչախմբում, Կոնսերվատորիայի երիտասարդական երգչախմբում, որը նրա ղեկավարմամբ արժանացել է հանրապետական մրցույթի Grand-prix մրցանակի, ինչին զուգահեռ Էմին Խաչատրյանի դասարանում եղել է ասիստենտ-ստաժոր:
1992-2000 թթ.-ից հանդիսացել է Գյումրու պետական սիմֆոնիկ նվագախմբի և Գյումրու կամերային երգչախմբի գեղարվեստական ղեկավարն ու գլխավոր դիրիժորը:
1995թ.-ին Երևանում ստեղծել է «Հայ ֆոլկ» վոկալ անսամբլը, որը բացառիկ հաջողություններ է ունեցել հանրապետությունում և բազմաթիվ հյուրախաղերով հանդես եկել արտերկրում:
2000թ.-ից Հայաստանի պետական կամերային երգչախմբի գեղարվեստական ղեկավար և գլխավոր դիրիժորն է: Հյուրախաղերով ելույթներ է ունեցել Փարիզում (Սեն-Լուի, Սալ Գավո), Լիոնում, Մարսելում, Հալեպում, Դամասկոսում, Լաթակիայում, Թբիլիսիում, Մոսկվայում, Սանկտ Պետերբուրգում (Սպիտակ դահլիճում, Սմոլնի տաճարում, Գլազունովի դահլիճում), Հանովերում, Ֆրանկֆուրտում, Ստրասբուրգում, Բերգամոյում (Դոնիցետտիի սրահում), Տորոնտոյում, Օտտավայում, Դրեզդենում (Ֆրաուկիրխե տաճարում Դրեզդենի ֆիլհարմոնիկի հետ համատեղ):
Հայաստանի մշակութային կյանքի և երաժշտության մեջ նշանակալի ներդրման համար 1996 թվականին պարգևատրվել է «Մովսես Խորենացու» անվան մեդալով:
ԱՐՄԵՆ ԱՐԱԲՅԱՆ
մասնաճյուղի ղեկավար
ՀՊԿԵ-ի տնօրեն Արմեն Արաբյանը դասական երաժշտության ուղղվածություն ունեցող կազմակերպությունների թրծված ու հմուտ կառավարիչ է: 1975թ. ավարտելով Երևանի Կոմիտասի անվան պետական կոնսերվատորիայի ջութակի բաժինը` Արաբյանն աշխատանքի է անցել Հայաստանի պետական սիմֆոնիկ նվագախմբում` որպես ջութակահար: Նույն ժամանակահատվածում նա ջութակի դասեր է տվել Տ. Չուխաջյանի անվան երաժշտական դպրոցում: 1978թ. որպես ջութակահար միանալով ՀԽՍՀ Ռադիոհեռուստապետվարչության սիմֆոնիկ-էստրադային նվագախմբին` 1988-ին ստանձնել է այդ կազմակերպության տնօրենի պաշտոնը: 1991-93թթ. ՀՀ Ռադիոհեռուստապետվարչության երաժշտական հաղորդումների գլխավոր խմբագրության տնօրենն է եղել: 1993թ. նշանակվել է ՀՀ Ռադիոհեռուստապետվարչության պետի գլխավոր խորհրդականի պաշտոնում: Երկու տարի անց դարձել է ՀՀ տեղեկատվության նախարարության միջազգային կապերի վարչության պետ:
1996-97թթ. ծառայել է Երևանի քաղաքապետարանի մշակույթի վարչության պետի տեղակալի պաշտոնում: 1997-ին Արաբյանը ստանձնել է ՀՀ մշակույթի նախարարության Հայաստանի պետական կամերային նվագախմբի տնօրենի պաշտոնը, իսկ 2009-ից ի վեր իր ստեղծագործական ողջ ներուժն ուղղել է Հայաստանի պետական կամերային երգչախմբի կայացման գործին:
2007-ից Ա. Արաբյանը ՀՀ մշակույթի նախարարության ոսկե մեդալակիր է իսկ 2011-ին արժանացել է ՀՀ Արվեստի վաստակավոր գործչի պատվավոր կոչման: