Երաժշտախմբեր

ԵՐԵՎԱՆԻ ՊԵՏԱԿԱՆ ԿԱՄԵՐԱՅԻՆ ԵՐԳՉԱԽՈՒՄԲ

1996 թ. ՀՀ արվեստի վաստակավոր գործիչ Հարություն Թոփիկյանի հիմնադրած Երևանի կամերային երգչախումբը կարճ ժամանակում գտել է իր ուրույն տեղը հայ երաժշտական հանրության շրջանում՝ ճանաչվելով որպես Հայաստանի երգչախմբային հեղինակավոր կոլեկտիվ:  2009 թ. երգչախումբը ստացել է պետական կարգավիճակ՝ վերանվանվելով Երևանի պետական կամերային երգչախումբ (ԵՊԿԵ):

ԵՊԿԵ-ն բազմաթիվ համերգներ է ունեցել Հայաստանում և արտերկրում: «Գերմանիայում հայ մշակութային օրերի» շրջանակներում երգչախումբը փայլուն  ներկայացրել է Կոմիտասի վերականգնված պատարագը, ինչպես նաև կոմպոզիտոր Տիգրան Մանսուրյանի նոր ստեղծագործությունները Բոննում, Հալլեում, Վիտենբերգում և Մագդեբուրգում, ապա Սիրիայում և Լիբանանում (1998թ.):

1999 թ.  երգչախումբը ներկայացրեց Տիգրան Մանսուրյանի «Արվեստ քերթության» (Ars Poetica) կոնցերտի պրեմիերան և ձայնագրեց ձայնասկավառակ։

Երգչախմբի հետ ելույթ են ունեցել աշխարհահռչակ երաժիշտներ՝ ջութակահար Կիմ Քաշքաշյանը, սաքսոֆոնահար Յան Գարբարեկը, «Լա Սկալա» թատրոնի ֆիլհարմոնիկ նվագախումբն ու երգչախումբը՝ Ռիկարդո Մուտիի ղեկավարությամբ, «Frankfurter Kantorei»-ն՝ Ուինֆրիդ Թոլի ղեկավարությամբ։

ԵՊԿԵ-ն  «Լույս ի լուսո» նախագծի շրջանակներում ականավոր ջազ դաշնակահար Տիգրան Համասյանի հետ ձայնագրել է դաշնամուրի և երգչախմբի համար դաշնակահարի մշակած հոգևոր երաժշտության ալբոմը (2014թ., ECM Records):

2015թ.  Տ. Համասյանը և երգչախումբը բազմաթիվ հյուրախաղեր են ունեցել եվրոպական մի շարք երկրներում, ներառյալ Թուրքիայում և Վրաստանում:

Երգչախումբն առաջին անգամ կատարել է Կոմիտասի «Բեռլինյան պատարագը» (2012 թ.), Կարա Մուրզայի առաջին բազմաձայն պատարագը (2013 թ.) և Ա. Այտնյանի և Ջ. Բյոմի «Մխիթարյանց պատարագը» (2014 թ.):

Երգչախումբը թողարկել է 16 ձայնասկավառակ, այդ թվում՝ «ԿՈՄԻՏԱՍ վարդապետի երաժշտությունը» ձայնասկավառակը, որը  Գլենդելում  կայացած 3-րդ ամենամյա հայ երաժշտության մրցանակաբաշխությանն արժանացել է «Լավագույն ավանդական ալբոմ» մրցանակին:

2021-ից ԵՊԿԵ գեղարվեստական ղեկավարն ու գլխավոր խմբավարը Քրիստինա Ոսկանյանն է։

2022թ.-ի սեպտեմբերի 21-ից 25-ը Երևանի պետական կամերային երգչախումբը մասնակցություն ունեցավ Լեհաստանում անցկացվող ամենամյա միջազգային «Հայնովկա» ուղղափառ եկեղեցական երաժշտության փառատոնին, որ թվով 41-րդն էր:

ԵՊԿԵ-ն համերգներ ունեցավ Վարշավայում Սուրբ Երրորդության Ավետարանական Աուգսբուրգ եկեղեցում և Բելիստոկ քաղաքի ֆիլհարմոնիայի և օպերայի դահլիճում (Podlasie Opera and Filharmonic in Bialystok):

Փառատոնի ավարտին ԵՊԿԵ-ն արժանացավ առաջին մրցանակին՝ պրոֆեսիոնալ երգչախմբեր անվանակարգում:

ՀԱՐՈՒԹՅՈՒՆ  ԹՈՓԻԿՅԱՆ

Հիմնադիր 

Դիրիժոր Թոփիկյանի մասնագիտական գործունեությունը սկսվել է 1973թ, երբ նա ավարտել է Երևանի Կոմիտասի անվան պետական կոնսերվատորիան: Այդ ժամանակից ի վեր Հարություն Թոփիկյանը հաջողությամբ ղեկավարել է մի քանի երգչախմբեր` հիմնադրել և ղեկավարել է Հայաստանի պետական ռադիոյի և հեռուստատեսության կամերային երգչախումբը, Երևանի պետական համալսարանի «Կոմիտաս» երգչախումբը, Երևանի կամերային երգչախումբը: 1982թ. արժանացել է Հայաստանի «ԼԿԵՄ» պետական մրցանակի:

Հարություն Թոփիկյանի ղեկավարած երգչախմբերը մասնակցել են միջազգային բազմաթիվ փառատոնների և մրցույթների: 1987թ.-ին Լիտվայի Հանրապետության Կաունաս քաղաքում միութենական 19 համալսարանական  երգչախմբերի  հեղինակավոր մրցույթում գրավել է առաջին տեղը:

1991 թ.-ին Հարություն Թոփիկյանը դարձել է  «Bridges of song Tallinn-91» (Էստոնիա) արևելք-արևմուտք միացյալ երգի փառատոնի կազմակերպիչներից մեկը, ուր նա պատիվ է ունեցել  ղեկավարելու 20.000 հոգանոց հզոր երգչախումբը: Այդ նույն տարի նա հրավիրվել է Ֆինիկսում (Արիզոնայի նահանգ) կայացող ամերիկյան երաժշտական ասոցիացիայի ամենամյա կոնվենցիային:

1991թ.-ին Հարություն Թոփիկյանը եղել է «Երգի կամուրջներ» փառատոնի կազմակերպիչներից մեկը: Տալլինում նրա ղեկավարությամբ աշխարհի միացյալ 20000 հոգանոց երգչախումբը կատարել է Կոմիտասի «Ազգային օրհներգը»: Այդ նույն տարի նա հրավիրվել է Ֆինիկսում (Արիզոնայի նահանգ) կայացող ամերիկյան երաժշտական ասոցիացիայի ամենամյա համաժողովին:

2000թ. Գլենդելում կայացած 3-րդ ամենամյա հայկական երգի մրցանակաբաշխության  ժամանակ «Լավագույն ավանդական ալբոմ» մրցանակը շնորհվել է Երևանի կամերային երգչախմբի «Կոմիտաս Վարդապետի երգերը» սկավառակին: Երգչախմբի` Թոփիկյանի դիրիժորությամբ շատ ձայնագրություններ արխիվացված են Հայաստանի հանրային ռադիոընկերության ֆոնդում:     

Քրիստինա Ոսկանյան

Գեղարվեստական ղեկավար և խմբավար

Ծնվել է 1974 թ. երաժիշտների ընտանիքում, Երևանում։ 3 տարեկանից նվագել է դաշնամուր և այնուհետև 6 տարեկանից հաճախել է Սայաթ-Նովայի անվան դպրոց։

1993-ին ավարտել է է Ռ․ Մելիքյանի անվան երաժշտական ուսումնարանն ու ընդունվել Կոնսերվատորիա որպես խմբավար՝ պրոֆեսոր Հ․ Միրզոյանի դասարան։ Զուգահեռ աշխատել է օպերային ստուդիայի երգչախմբում։ 1996-ին Հ․ Թոփիկյանի կողմից հիմնվել է Երևանի պետական կամերային երգչախումբը, որտեղ աշխատում է հիմնադրման օրվանից մինչ օրս։ Երգչախմբի համար բազմաթիվ դասական ստեղծագործությունների մշակումների և փոխադրությունների հեղինակ է: Հանդես է եկել բազում նախագծերում։

2013-2015 թթ. աշխատել է Ջրվեժի Կաթողիկե եկեղեցում որպես խմբավար: Որպես խմբավար՝ մասնակցել է բազում նախագծերի: 2015-ին Տիգրան Համասյանի հետ «Լույս ի Լուսո» ծրագրում հանդես է եկել որպես մեներգչուհի: Էրեբունի-Երևանի միջոցառմանը նույն տարում ԵՊԿԵ-ն հանդես է եկել իր ղեկավարությամբ:

2017-ին երգչախումբը հանդես է եկել Ռուսաստանից ժամանած 3 երգչախմբերի հետ։ Ներկայացվել է Կ․ Ջենկինսի ստեղծագործություններից մեկը, որը պատրաստել է Քրիստինա Ոսկանյանը: 2018-ին երգչախումբը հանդես է եկել միացյալ երգչախմբերի հետ մեծ համերգով, որի ընթացքում ներկայացվել է Ք․ Պենդերեցկու գործերից մեկը։ ԵՊԿԵ-ի հետ աշխատանքը տարել է հենց Ոսկանյանը:

2018-ին մայիսի 28-ի տոնակատարությունների շրջանակներում երգչախումբը մասնակցել է մեծ համերգի, որի ծրագիրը պատրաստել է Ոսկանյանը:

2018-2019 թթ. Մալաթիայի Հայորդյաց տանն աշխատել է որպես խմբավար:

ԵՎԱ ԽԱՉԱՏՐՅԱՆ

Մասնաճյուղի ղեկավար

Եվա Խաչատրյանը անկախ համադրող է և արվեստի մենեջեր: 1996 – 2001 սովորել է Կոմիտասի անվան Երևանի պետական կոնսերվատորիայում երաժշտության տեսության բաժնում, ավարտել է իբրև երաժշտագետ:

2003-2008 աշխատել է իբրև համադրող Նորարար Փորձարարարական Արվեստի Կենտրոնում (ՆՓԱԿ): Նույն հաստատությունում 2006-2008 ստանձնել է կերպարվեստի բաժնի համատնօրենի պաշտոնը:  2010-11 Բեռլինում մասնակզցել է Գյոթե ինստիտուտի կողմից իրականացված մշայութային մենեջերների համար նախատեսված վերապատրաստման ծրագրին: 2004 - 2017 համագործակցել է Թբիլիսիում Գյոթե Ինստիտուտի հետ, այնուհետև 2018-ից մինչ օրս Երևանում հիմնադրած Գյոթե կենտրոնի: 2005-ից ԱԻԿԱ Հայաստան (AICA Armenia), արվեստի քննադատների միջազգային ասոցիացիայի անդամ է, 2013-ից՝ փոխնախագահը:

2007-ից արդի և ժամանակակից արվեստի թանգարանների և հավաքածուների միջազգային կոմիտեի (CIMAM) անդամ է: 2007 – 2012 Վարշավայում The Other Space հիմնադրամի կողմից իրականացվող Տրանսկովկաս փառատոնի կազմակերպիչներից էր՝ ապահովելով Հայաստանից արվեստագետների մասնակցությունը:

2012 – 13 թթ․ Երևանում Ժամանակակից արվեստի ինստիտուտում ղեկավարել է «Ցուցահանդեսի աշխատանք և արվեստի մենեջմենթ» մոդուլը և հիմնադրել է Project Lab-ը: 2014 – 19 համակարգել է Frauenkulturbüro NRW e.V. արվեստի կացարանի փոխանակման ծրագիրը՝ նախատեսված Հայաստանից և Գերմանիայից կին արվեստագետների համար:

2017-ից մինչ օրս համակարգում է ArtsLink-ի Art Prospect արվեստագետների և համդրողների համար իրականացվող կացարանի ծրագիրը: 2018-ից Armenia Art Fair-ի կազմակերպիչներից է:

2009-ից նա ղեկավարում է «Արվարձան մշակությային կենտրոն» հարթակը www.suburb.am