«Որտեղ ձայները հանդիպում են նվագախմբին…»
Կոմիտասի անվան կամերային երաժշտության տանը փետրվարի 24-ին Հայաստանի պետական կամերային նվագախումբը, Լիբանանյան հյուրախաղերին ընդառաջ, ներկայացրել է գեղեցիկ համերգային երեկո՝ «Որտեղ ձայները հանդիպում են նվագախմբին» խորագրի ներքո։
Համերգային ծրագրում հնչել են հայ և համաշխարհային երաժշտարվեստի գոհարներ։ Երեկոն բացվել է Էդվարդ Միրզոյանի տոնական վալսով՝ ստեղծելով հանդիսավոր ու ջերմ տրամադրություն։
Ծրագրում երաժշտասերներն ունկնդրել են Ղազարոս Սարյանի, Լուիջի Արդիտիի, Ֆրանց Շուբերտի, Ռոբերտ Ամիրխանյանի, Արամ Խաչատրյանի, Ջակոմո Պուչինիի, Մարինե Ալեսի, Արմեն Տիգրանյանի և այլ հեղինակների ստեղծագործություններ՝ յուրաքանչյուրն իր ոճով ու հնչերանգով հարստացնելով երեկոյի բազմերանգ գունապնակը։
Համերգը ղեկավարել է բրիտանահայ դիրիժոր, տենոր և համերգի գեղարվեստական ղեկավար Սիփան Օլահը, որպես մենակատարներ հանդես են եկել սոպրանո Շողիկ Թորոսյանը՝ Լիբանանից, դաշնակահար Մարիա Փալազյանը՝ Միացյալ Թագավորությունից, որոնք իրենց վարպետությամբ ու զգացմունքային մեկնաբանությամբ ամբողջացրել են երեկոյի գեղարվեստական պատկերը։