Վրացի դաշնակահար Վալերիան Շիուկաշվիլիի առաջին մենահամերգը Հայաստանում
Կոմիտասի անվան կամերային երաժշտության տանը փետրվարի 20-ին կայացել է վրացի անվանի դաշնակահար Վալերիան Շիուկաշվիլիի մենահամերգը։ Երաժիշտն առաջին անգամ էր ելույթ ունենում Հայաստանում։
Դաշնակահարն երևանյան հանդիսատեսին ներկայացրել է իր նուրբ երաժշտական մտածողությունը, վիրտուոզ տեխնիկան և խորապես լիրիկական մեկնաբանությունները։
Համերգային ծրագիրը ներառում էր երեք մեծ կոմպոզիտորների ստեղծագործություններ։ Նրա յուրօրինակ կատարմամբ երեկոյի ընթացքում հնչել են Դոմենիկո Սկարլատիի սոնատները, Վոլֆգանգ Ամադեուս Մոցարտի «Սոնատ №10» և «Դո մաժոր» ստեղծագործությունները, ինչպես նաև Ֆրեդերիկ Շոպենի մազուրկաները։
Հանդիսատեսի ջերմ ընդունելության և երկարատև ծափահարությունների ներքո դաշնակահարը կատարեց մի քանի բիս։
Համերգը կազմակերպվել էր «Պարոնյան» ընկերության և Կամերային երաժշտության ազգային կենտրոնի նախաձեռնությամբ։
Շիուկաշվիլին վրացի դաշնակահար է, որն առանձնանում է նուրբ երաժշտական մտածողությամբ և արտահայտիչ կատարողականությամբ։ Նրա մեկնաբանությունները համադրում են դասական դպրոցի հստակությունը և զգացմունքային խորությունը՝ ստեղծելով անմիջական կապ հանդիսատեսի հետ։ Նա նաև «Generalbass» բարոկո երաժշտության միջազգային դաշնամուրային մրցույթի գլխավոր և մշտական ժյուրիի անդամ է։