Հայաստանի պետական կամերային նվագախմբի բացառիկ համերգը Փարիզի Մադլեն եկեղեցում
Հայաստանի պետական կամերային նվագախումբը սեպտեմբերի 25-ին Փարիզի Մադլեն եկեղեցում հանդես է եկել բացառիկ համերգով՝ «Երաժշտական հրավառություն» համերգային ծրագրի շրջանակում ներկայացնելով բացառապես հայ կոմպոզիտորների ստեղծագործություններ։
Հայաստանի պետական կամերային նվագախումբը դարձավ առաջին հայաստանյան երաժշտախումբը, որը ելույթ է ունեցել Մադլեն եկեղեցում։
Համերգին ողջույնի խոսքով հանդես է եկել Ֆրանսիայում ՀՀ դեսպան Արման Խաչատրյանը: Երեկոյին ներկա էր նաև ՀՀ կրթության, գիտության, մշակույթի և սպորտի նախարարի տեղակալ Դանիել Դանիելյանը։
Մադլեն եկեղեցու լեփ-լեցուն սրահում հնչել են Կոմիտասի, Արամ Խաչատրյանի, Տիգրան Մանսուրյանի, Ռոբերտ Ամիրխանյանի և Շառլ Ազնավուրի ստեղծագործություններ։ Համերգը ղեկավարել է դիրիժոր Սիփան Օլահը, իսկ մենակատարներն էին՝ Հայարփի Եղիկյան (սոպրանո), Հակոբ Մուրադյան (հոբոյ) և Սոնա Բարսեղյան (դաշնամուր)։
Հայկական մշակույթին և երաժշտությանը նվիրված այս հիշարժան երեկոն կայացել է Ֆրանսիայում ՀՀ դեսպանության բարձր հովանու ներքո, ՀՀ կրթության, գիտության, մշակույթի և սպորտի նախարարության, ՀԲԸՄ-Ֆրանսիայի և «Հայաստանի դեսպանության բարեկամներ» միության աջակցությամբ։
Համերգին ներկա էին Ֆրանսիայում հավատարմագրված օտարերկրյա դեսպաններ և դիվանագիտական ներկայացուցչությունների անդամներ, ֆրանսիացի մշակութային և հասարակական գործիչներ, ինչպես նաև ֆրանսահայ համայնքի ներկայացուցիչներ: