«…և մի անլուրջ համերգ». «Հովեր» երգչախմբի տարեվերջյան արտասովոր համերգ-ներկայացումը
«Հովեր» պետական կամերային երգչախումբը դեկտեմբերի 17-ին ներկայացրել է «…և մի անլուրջ համերգ» խորագրով արտասովոր տարեվերջյան համերգը։
Համերգային ծրագիրը բաղկացած էր չորս ենթաբաժնից, որոնցից յուրաքանչյուրում ներկայացվում էին տարբեր պատմություններ՝ ոչ սովորական երգչախմբային արվեստի, արտասովոր իրավիճակների, հետաքրքիր բեմական լուծումների և ձևավորման միջոցով։
Համերգային ծրագիրը ներկայացնում էր երաժշտական և թատերական մտածողության բազմազան ու համարձակ համադրություն՝ դասականից մինչև ժամանակակից ստեղծագործություններ, հումորային, փիլիսոփայական և աբսուրդի տարրերով։ Կոմիտասից և Բախից մինչև Ջոն Քեյջ, Լուչանո Բերիո ու ժամանակակից հայ հեղինակներ՝ ծրագիրը հանդիսատեսին տարավ անսպասելի հնչողությունների, խաղային ձևերի և ոչ սովորական երաժշտական պատմությունների աշխարհ։
Համերգը ղեկավարել է Երգչախմբի գեղարվեստական ղեկավար և խմբավար Սոնա Հովհաննիսյանը, երգչախմբավարի օգնական՝ Տաթևիկ Դանիելյան, կոնցերտմայստեր՝ Կիմա Օհանյանը։
Մենակատարներ՝ Արամո Մամիկոնյան (շեփոր, ակորդեոն), Աշոտ Մարգարյան (հարվածային գործիքներ), Սոնյա Ենգիբարյան (տավիղ), Վահագն Բաբլոյան (կախոն)։